អត្ថន័យនៃទង់ជាតិខ្មែរ

គ្រប់ជាតិសាសន៍នៅលើសកលលោក តែងតែមានទង់ជាតិសម្រាប់សម្គាល់ជាតិសាសន៍របស់ខ្លួន។ ផ្ទាំងសំពត់ដែល គេបង្ហូតឡើងទៅលើ មានសញ្ញាសម្គាល់ប្លែកៗពីគ្នាទៅតាមប្រទេសនីមួយៗ។ សាច់ក្រណាត់ពណ៌ក្រហម ខៀវ និងមានរូបប្រាសាទកំពូលបីចំកណ្តាលពណ៌ស បានបក់រវិចៗដូចផ្នក់​ទឹករលក នៅលើឰដ៏អាកាសជាសញ្ញាបញ្ជាក់ថានេះជាទង់ជាតិខ្មែរ។
រូបភាព និងសាច់ក្រណាត់ដ៏តូចនេះ មានតំលៃអនេក ព្រោះវាជាដួងព្រលឹង ដែលបង្កប់នូវអត្តសញ្ញាណជាតិ យ៉ាងពិតប្រាកដ។ បើនិយាយពីអត្ថន័យនៃពណ៌ បានស្តែងឲ្យឃើញថា ពណ៌ខៀវក្រម៉ៅ បង្ហាញពីសម្បត្តិធម្មជាតិ​ យ៉ាងច្រើនសន្ធឹកសន្ធាប់ ទាំងនៅលើ និងក្រោមដី។ ឯពណ៌ក្រហមឆ្អៅ បង្កប់ពីទឹកចិត្តដ៏អង់អាចក្លាហាន មោះមុត និង ការធ្វើ​ពលិកម្មដើម្បីការពារបូរណភាពទឹកដីឲ្យគង់វង្ស។ ឯរូបប្រាសាទ មានក្បូរក្បាច់រចនាដ៏ល្អប្រណីត បង្ហាញឲ្យឃើញពីភាពឧស្សាហ៍ព្យាយាម និង តម្លៃសិល្បៈដ៏វិសេសវិសាលរបស់ខ្មែរ។ មិនតែប៉ុណ្ណោះ ទង់ជាតិជានិមិត្តភាព តំណាងឥ្យព្រលឹងវប្បធម៌ជាតិទាំងមូល ដែលបញ្ជាក់ថាខ្មែរយើងមានឈ្មោះក្នុងផែនទីពិភពលោកនៅឡើយ។
ដូច្នេះ ក្នុងនាមយើងជាកុលបុត្រ កុលធីតាខ្មែរ ក្មេង ចាស់ ប្រុស ស្រី ត្រូវស្មោះស្ម័គ្ររួមគ្នា ការពារទង់ជាតិរបស់យើង ឲ្យមានជីវិតអមតៈនៅលើទឹកដីអង្គរដ៏បវរនេះ ហើយយើងរួមគ្នាគោរព និងស្រលាញ់ឲ្យអស់ពីក្រអៅបេះដូង។

"វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន"​

ទង់ជាតិខ្មែរ